Su’ petali di rosa li to’ mani,
quannu tutti i matini
m’accarizzi e t’avvicini.
Mani di donna,
mani di mamma,
mani chi dannu luci a li me iorna.
Cauddi e picciriddi,
lisci e ciauriusi,
quannu mi li passi n’te capiddi.
Travagghiunu di iornu,
lesti e sicuri
tra pinni, libri e nu quadernu.
Mi parrunu li to’ mani..,
quannu m’i n’zonnu n’to me’ lettu,
si nui semu luntani.
Mani di fimmina priziusa,
bedda, n’triganti e fina,
ma fimmina ardita e curaggiusa!
Amuri, chi sunnu li tò mani?
Pi mia su’ paradisu
di ieri, oggi e pi dumani..
Di li to’ mani un gestu,
nu richiamu, nu salutu, nu signali..
e ti raggiungiu lestu!
Senza paroli, senza di na’ vuci,
unciemu i nostri manu
e ritti, avanzi annamu:
l’amuri ni cunnuci!
di Lillo Centorrino
