Cunfusioni, acqua e lurdia,
buddellu, buci ma alligria.
Semu o’ mercatu: frutta, carni e ‘a piscaria,
ogni putiaru bannia ‘a so’ mircanzia.
Trasu e nesciu di’ bancarelli,
cull’occhi supra e sutta li scaffali:
cu tutti ‘sti culuri, pari cannaluvari!
Don Brasi bannia ‘a so’ scarola:
“ogni tri mazzi vi dugnu du tritrola!”
Nunziatina stira ‘u coddu a ‘na jaddina,
e ‘na spusina, schifiata, vidi ‘u sangu e s’alluntana.
‘U bancu di Ianciulina è ciauriusu,
salami, muttadella e fummaggiu cu’ puttusu,
e appressu, vadda chi su’ beddi,
ci sunnu alivi niri e stuppateddi.
Baccalaru, ventri e piscistoccu,
dda, chi manu a moddu, c’è cumpari Roccu
cu Ginu, ‘u pisciaru, chi netta n’cioiarina,
piscata frisca frisca, ‘i stamatina!
Cuntunu soddi spicci ‘i vecchiareddi,
pi’ pagari un coppu ‘i calamareddi
e a braccettu, du’ fimmini m’pupati
cattunu biscotta e zuccarati.
“U pani ‘u pigghiasti?”
Ci dici ‘a mugghieri ‘o mariteddu,
ma iddu n’ta li banchi si “rimina”
n’tisatu e rittu comu nu’ cardiddu…
Chistu mi ricoddu, cu’ me nonna Michina:
era ‘u mercatu di Lillu picciriddu !
di Lillo Centorrino
